Arkitektahönnun: Haraldur S. Árnason (HSÁ Teiknistofa)
Verkfræðihönnun: Haraldur S. Árnason (HSÁ Teiknistofa)
Raflagnahönnun: Raftákn ehf.
Raflagnir: Rafmenn ehf.
Pípulagnir: Varmastýring ehf.
Málning: Málningarmiðstöðin ehf.
Uppsteypa og frágangur: Rök ehf.
Innanhússráðgjöf: Jensson hönnunarhús, Ólafur Jensson
Byggingarstjóri: Böðvar Kristjánsson
Byggingaraðili / Seljandi: Ásatún ehf. & Ásatún 44-46 ehf.

Byggð verða 4 hús með samtals 60 íbúðum. Íbúðirnar verða vandaðar og vel hannaðar. Annars vegar er um að ræða rúmgóðar 2-3 herbergja íbúðir  og hins vegar rúmgóðar 3-4 herbergja íbúðir í 4ja hæða fjölbýlishúsum með lyftu. Íbúðirnar eru 65,5 m2 og 84,4 m2 auk sér geymslu í sameign sem er tæpir 2 m2 auk sameiginlegrar geymslu fyrir hjól og vagna. Íbúðirnar eru með opnar svalir sem snúa til suð-vesturs. Í göngufæri frá húsunum eru framhaldsskólar, grunnskóli, leikskóli, verslunin Bónus, golfvöllur og frábærar gönguleiðir.

Í fyrsta áfanga, verða reistar 15 íbúðir í Ásatúni 40 og 15 íbúðir í Ásatúni 42.

Í öðrum áfanga, verða reistar 15 íbúðir í Ásatúni 44 og 15 íbúðir í Ásatúni 46.

Íbúðum verður skilað fullfrágengnum sem og sameign og lóð.

Húsin skilast fullbúin að utan. Burðarvirki húsanna er steinsteypt með hefðbundnum hætti og eru útveggir einangraðir að utan með 100 mm. steinull.

Klæðning
Húsin verða klædd með með lituðu stáli, láréttri báru að mestu leyti. Litir útveggja eru í ljósgráum lit (Ral 7038) en stigahús í dökkgráum lit (Ral 7011). Viðarklæðning verður á veggflötum við svalir þar sem það á við.

Þak
Þakplata er steypt með halla fyrir 200 mm. einangrun sem klædd er með þakpappa. Þakniðurföll koma í þak en lóðréttar lagnir frá þeim eru staðsettar í lagnastokk innanhúss. Þakvirki er byggt úr 60 mm. forsteyptri „filegran“ plötu og ásteypulagi.

Svalir
Svalagólf eru forsteyptar einingar og verða frágengin með steyptu yfirborði. Svalahandrið verða úr málmi og gleri. Á svölum íbúða er útiljós og rafmagnstengill. Svalalokun verður á inngangssvölum og svalir íbúða útfærðar þannig að hægt sé með litlum tilkostnaði að koma fyrir svalalokunarkerfi.

Gluggar og Hurðir
Gluggar eru hefðbundnir ál/trégluggar með tvöföldu einangrunargleri. Gluggar eru ísteyptir. Hurðir eru smíðaðar úr timbri og með tvöföldu gleri og settar í eftir á. Gluggar og útihurðir eru álklæddir að utan í dökkgráum lit (Ral 7011) og hvítir að innan. Ál/tré glugga- og hurðakerfið í húsunum er frá Byko.

Lóð
Lóð umhverfis hús er graslögð. Gangstéttir eru steyptar/malbikaðar en bílastæði og akvegir malbikaðir. Snjóbræðsla verður í stæðum fyrir hreyfihamlaða, inngangsstéttir við hús og steyptar gangstéttar og í sorpgerði. Íbúðum á 1. hæð fylgir sérnotasvæði sem gengur 2,6 m. út fyrir verönd.
Seljanda ber ekki að skila lóð fullfrágenginni á sama tíma og íbúð er afhent.

Íbúðum verður skilað með handslökkvitæki og reykskynjara.

Gólf

Milligólf íbúða eru byggð úr 60 mm. forsteyptri „filegran“ plötu og 14 cm. ásteypulagi. Ofan á steypt milligólf kemur 30 mm. hljóðeinangrun og 70 mm. járnbent írennsli en gólfhiti og vatnslagnir eru lagðar ofan á hljóðeinangrun gólfs. Með þessu næst hámarks hljóðeinangrun á milli hæða. Hvíttað eikarparket (harðparket) með hljóðdeyfidúk er á gólfum íbúða, flísar eru á gólfum forstofu og baðherbergis/þvottahúss.

Veggir

Staðsteyptir veggir verða spartlaðir og málaðir. Léttir innveggir eru úr tvöföldu gifsi og skilast þeir spartlaðir og málaðir. Fyrirkomulag innveggja verður í samræmi við samþykkta byggingarnefndarteikningu. Veggir verða málaðir í ljósum lit. Baðherbergisveggir skilast flísalagðir og málaðir.

Loft

Steypt loft verða slípuð, spörtluð og máluð í ljósum lit.

Innihurðir

Hurðir verða með lykillæsingu og hurðarhúnar verða úr burstuðu stáli. Innihurðir verða hvítsprautaðar með hefðbundnum hurðarkörmum og gereftum.

Eldhús

Eldhús skilast fullbúin með tækjum frá Electrolux, þar með talið svörtu keramikhelluborði, stálviftu með vélrænu útsogi í innréttingu, bakarofni með grilli og kjöthitamæli og uppþvottavél. Stálvaskur er fræstur í borðplötu.  Eldhúsinnrétting er íslensk sérsmíði frá AXIS með mjúklokunarbúnaði. Innrétting verður hvíttuð eik (Melaminhúð) og hvítsprautaðir efri skápar. Lýsing undir efri skápum.

Baðherbergi/þvottur

Baðherbergisgólf eru flísalögð. Veggir eru flísalagðir upp í loft með ljósum flísum að undanskildum hurðarvegg sem verður spartlaður og málaður í ljósum lit. Baðinnrétting er íslensk sérsmíði frá AXIS úr Strúktur eik (Melamin yfirborði). Tengi er fyrir þvottavél og þurrkara. Gert er ráð fyrir þurrkara með rakaþétti. Hvít postulínstæki eru á baðherbergjum og salerni er vegghengt með innbyggðum vatnskassa. Sturtugólf er einhalla með glervængjum. Blöndunartæki á baði eru hitastýrð einnar handar blöndunartæki. Lýsing er í lofti og í kappa yfir spegli.

Hreinlætistæki

Öll hreinlætis- og blöndunartæki eru frá Tengi, af viðurkenndri gerð og koma þar sem teikningar sýna.

Svefnherbergi

Fataskápar eru í svefnherbergjum sbr. innréttingateikningar. Fataskápar eru íslensk sérsmíði frá AXIS sprautulakkaðir hvítir.

Forstofa

Fataskápur er í forstofu sbr. innréttingateikningar. Fataskápar eru íslensk sérsmíði frá AXIS úr Strúktur eik (Melamin yfirborði).

Geymsla og herbergi

Fataskápar eru í svefnherbergjum sbr. innréttingateikningar. Fataskápar eru íslensk sérsmíði frá AXIS sprautulakkaðir hvítir.

Geymslur í sameign

Hverri íbúð fylgir ein geymsla í sameign og eru þær á jarðhæð. Gólf í geymslum verða máluð og veggir (óeinangraðir léttir veggir) verða málaðir. Gólfhitakerfi og hefðbundin lýsing verður í geymslum. Stærð geymslu kemur fram í kaupsamningi. Hurðir eru hvítmálaðar. Fyrir framan geymslurnar er sameiginlegt rými sem getur nýst sem hjóla- og vagnageymsla.

Rofar og tenglar
Rofar og tenglar (fyrir rafmagn, tölvu/síma og loftnet) verða settir upp í samræmi við raflagnateikningar. Tenglar í stofu eru, tölvutengill (ljósleiðari) fyrir 1 sjónvarpstengil og 1 símatengil. Ljósakúplar verða á baði/þvottahúsi, geymslu og kappalýsing í innréttingum. Önnur ljós fylgja ekki innan íbúðar. Útiljós við innganga og svalir verða frágengin. Öll ljós í sameign fylgja. Kaupandi leggur til önnur ljós.
Dyrasími fylgir íbúðum á 2. 3. og 4. hæð. Lagnir fyrir mynddyrasíma eru til staðar í þessum íbúðum. Í íbúðum 1. hæðar er dyrabjalla.

Ljósleiðari
Ljósleiðari verður tengdur úr sameign inn í hverja íbúð og þaðan í tengil í stofu. Í öðrum herbergjum eru lagnaleiðir fyrir tölvu/síma og loftnet.

Öryggiskerfi
Hver íbúð er sjálfstætt brunahólf. Reykskynjari og handslökkvitæki verður sett upp í hverri íbúð, í sameign og á hverja hæð í stigahúsi.

Íbúðir, sameign og geymslur verða upphitaðar með gólfhitakerfi. Í baðherbergjum verða handklæðaofnar. Neysluvatnskerfi verður frágengið og tengt blöndunar- og þrifatækjum. Neysluvatnskerfið verður með millihitara. Með því að hita upp kalt vatn með hitaveituvatni má halda kísil og öðrum steinefnum í lágmarki.

Vélrænt útsog er frá baðherbergi/þvottahúsi, eldhúsi og geymslum sameignar. Mjög hljóðlátar viftur frá Vent Axia eru á baðherbergi/þvottahúsi.

Sameign verður upphituð og fullfrágengin.

Anddyri stigahús
Gólf verður flísalagt og fullfrágengið með lýsingu. Loft og veggir verða sandspartlaðir og málaðir í ljósum lit. Póstkassar fyrir hverja íbúð verða staðsettir í anddyri. Aðgengi að póstkassa er bæði innandyra og utandyra. Lýsing í sameign verður fullbúin með tímarofa og/eða hreyfiskynjara. Útihurðir eru ál/tré hurðir frá Byko (með gleri).

Lyftur
Lyfta frá Kone er í hverju húsi.

Stigahús
Stigar í stigahúsum eru forsteyptir og verða tröppur og stigapallar teppalagðir en inngangspallar flísalagðir. Veggir og loft verða sandspörtluð og máluð í ljósum lit. Stigahúsin verða með uppsettum handriðum. Gólfhiti er í stigahúsi. Tímarofi og/eða hreyfiskynjari stýrir ljósum í stigahúsum.

Sorp
Sorpgerði eru við hvert hús.

Lýsingu þessari er ekki ætlað að vera tæmandi um einstök atriði.

Seljandi áskilur sér allan rétt til að gera efnis-, útlits- og tæknilegar breytingar meðan á byggingarframkvæmdum stendur.

Kaupanda er bent á að kynna sér eftirfarandi atriði vel:
• Að það gæti þurft að hreinsa sigti á blöndunartækjum nokkrum sinnum eftir að flutt er inn í íbúðina og fylgjast skipulega með niðurföllum í þvottahúsi, baði og úti á svölum. Gæta þarf sérstaklega að ekki frjósi í niðurföllum.
• Svalagólf er nauðsynlegt að sílanbera á ca. 2ja ára fresti ef þau eru ekki flísalögð.
• Nauðsynlegt er að olíubera timburklæðningu á svölum á ca. 3ja ára fresti.
• Nauðsynlegt er að smyrja lamir á opnanlegum fögum og svalahurðum svo þau festist ekki.
• Aðalhurðir á hverju stigahúsi verður að fylgjast vel með og umgangast þannig að engar þvinganir verði við umgang þeirra. Reglulegt viðhald hurðanna er nauðsynlegt.
• Varast ber að setja plastfilmu eða merkingu á gler eða setja gardínur þétt að gleri vegna rakamyndunar og sprunguhættu.
• Í steyptum nýbyggingum er mikill raki sem mun hverfa á 1-2 árum. Nauðsynlegt er að útloftun í íbúðum sé góð og mikilvægt er að fylgjast með vatnsmyndun (dögg) innan á gleri. Til að forða því að vatn safnist saman neðst á glerinu er mikilvægt að hafa glugga lítillega opna til að tryggja útloftun, sérstaklega þegar tekur að kólna úti. Gæta skal þess ávalt að útloftun baðherbergja sé góð og að viftur séu hreinar og rétt stiltar.
Ef þetta er ekki gert er hætta á að vatnið geti valdið skemmdum á gluggum, gólfefnum og málningu. Bent er á að hugsanlega þurfi að fara fram fínstilling á vélrænu loftræstikerfi og á hita- og vatnsstýrikerfi hússins eftir afhendingu íbúðar.

Seljandi ber ekki ábyrgð á eðlilegri og venjulegri sprungumyndun í múr, steypu og timbri. Gera má ráð fyrir því að kaupandi þurfi að endurmála íbúðir eftir nokkurn tíma þegar byggingin, þ.e. það byggingarefni sem í henni er hefur náð stöðugu ástandi.

Við afhendingu skal kaupandi skoða íbúðina ítarlega. Ef einhverjir ágallar finnast skal kaupandi, áður en hann hefur framkvæmdir í íbúðinni, afhenda fulltrúa Ásatúns undirritað eyðublað þar sem þessir ágallar eru taldir upp.

Íbúðarkaupendur gera sér grein fyrir að í sérgeymslum og öðrum geymslum geta verið lagnir í loftum og á veggjum sem nauðsynlegar eru vegna lagnaleiða hússins

Allt efni og teiknaðar þrívíddarmyndir á heimasíðu eru birtar með fyrirvara um hugsanlegar villur. Með þrívíddarmyndum er reynt að gefa eins góða mynd og hægt er. Ef texta byggingarlýsingar og skilalýsingar ber ekki saman gildir byggingarlýsing.